LJP

 

Oetgaeveriej Jeube Press, opgerích in 2009, kleurt witte plekke in 't Remunjse verleje in. 't Ongerzeuk rich zich veural op de plaatselikke vastelaovend, es uniek en érns te naeme sosjaal-maotsjappelik en kultureel versjiensel. Gepubliceerd waerd in oos eige taal. Inisjatiefnaemer, sjriever en oetgaever is Jean-Philippe Laugs (Remunj, 1962), arties van Sirkes Willems en aad-hoofredakteur van ’t Zjwetskammezaol van D’n Uul.

De beuk van Jeube Press zeen oetsjloetend te koup bie de bookhanjels Boom en Plantage (Neersjtraot Remunj), en op ebay.nl.

 

Op 15 november 2015 is versjene:

Waazes! Waazes!! De Flarusse, 1884-1914; Remunj’s eerste ‘moderne’ vastelaovesvereiniging & Wiej ’t zo wied kwaam

Waazes Waazes.jpg

De eerste Remunjse vastelaovesvereiniging van de moderne tied, De Flarusse, haet ein boejende mér ouch onverwáchs dynamiese gesjiedenis. In de inleiding op det verhaol, “De waereld op de kop”, zoomp dit book in op de Remunjse vastelaovend in de revolusjonaere 19e eew. Kinmerkend veur deze vastelaovend waas zien politieke bewuszeen, mit ein explosieve lajing diej door de waereldlikke en geistelikke euverhede lange tied neet gewaardeerd waerde, mit anger wäördteboe” waas. ‘t Book reik mit de onthulling van onbekinde feite en verbénj de sjleutels aan veur ’t juuste begrip van vastelaovend en politiek in de biesjopssjtad en veur de neet altied aeve soepel loupende relasie mit provinciehoofsjtad Mesjtreech. ’t Book guf daomit ein verklaoring waorom ’t vastelaovesfees in Remunj taege wil en dank nog ummer zo geleef is en intens belaef waerd.

 

De Flarusse, hoofongerwerp van “Waazes! Waazes!!”, gélje es de eerste “moderne” vastelaovesvereiniging van Remunj en es de direkte veurluiper van Schmookers (1898-1936) en SVV D’n Uul (1936-vandaag). Häör plotselinge ópkoms moog aevel neet verkeerd waere begrepe: ouch veur häöre tied vierde Remunj vastelaovend waas ´t fees gans ingebed in ´t Remunjse sosjale laeve. Veur ´t eers waerd ´t verhaol van de vereiniging noe kompleet en in ‘t juuste tiedsverloup verteld, van ópkoms toet ongergangk, in de konteks van maotsjappelikke en politieke ontwikkelinge. Eerdere publikasies (Schillings, Kohl, Wijers) deje waaliswaor inkele aspekte van dit eerwaarde gezelsjap oet de deuk, mér misde ´t euverzich en de achtergrunj, en, erger nog, sjlooge soms zellefs de plank mis. Det waerd noe rechgezat.

 

In “Waazes! Waazes!!” laes geer ongermeer euver de weulige begintied van de Flarusse, de betrokkeheid van de sosjeteit Gambrinus (1874-1892), de aafsjplitsing en ´t korte besjtaon van De Aanhaaijers (1885-1887), vergaete vastelaovesóptochte, ein opvallend groot aantal krisisse en besjtuurswisselinge, maotsjappelikke waardering en keuninklikke erkinning, de veurgengers en gangmaekers, feeste en bontje aovende, leefdadigheid, tombola´s en Sinterklaosfeeste, betrekkinge mit angere vereiniginge en verangerende verhajinge in media, kirk en politiek.

 

Waazes! Waazes!!”, ein full color oetgave mit hardcover, haet 304 pagina’s, wo-van mér leefs 54 mit foto’s en aafbeeldinge, en 28 mit originele tekste van de Flarusse in de bielage. ’t Book is riek verzeen van bróntekste en citate, haet ein noteapparaat en ein lieteratuuropgavePries: € 22,00.

 

 

De sjtad van Bacchus; Op zeuk nao de oorsjpronge van ’t Remunjse vastelaovesritueel(versjene 2013)  

Sjtad v Bacchus.jpg

 

’t Remunjse gebroek om de vastelaovend aaf te sjloete mit ’t verzoepe (drieve) van de sjtreuje bacchuspop sjting lange tied in de verdinking det ‘t eine hoge laeftied had. Aevel euvertuugend bewies daoveur goof ’t neet, de brónne ware raar en ’t bleef bie raoje omdet de kwestie noojt good ongerzóch waas. Dit book bringk dao noe verangering in.

In de eerste plaats is ongerzóch wiej wied de sjriftelikke brónne truuk gaon vanaaf 1947, ’t jaor det Bacchus door D’n Uul waerde truukgehaold oet ziene lethargiese sjtaot es bannelling. In eine weulige tied van taegesjtellinge tösse liberale en kattelieke waerde Bacchus mitgesjleip in de kontroverse. Det haet hem in 1921 oeteindelik ziene kop gekós en ein kwaolikke reputasie bezórg. De Sjtad van Bacchus geit dao oetveurig op in en prizzenteert nuuj (d.w.z. noojt eerder besjpraoke) tékste, onger angere van de Flarusse.

In 1991 wees aad-prins Thei Kohl d’r-op det Bacchus al in 1692 in Remunj verzaope mos zeen, ondanks ein verbod. Kohl baseerde zich op ein inkel citaat oet de raodsjtökke. Waat wiste veer dao noe helemaol mit? Gaaroet neet zo väöl!

Det 'citaat' is aevel ein belangriek oetgangspunt gewaore veur De sjtad van Bacchus. Waat bliek? De hilariese wettéks diej ’t ritueel verbooj is truukgevónje, de achtergrunj kinne waere gerekonstrueerd, ’t woróm is duudelik. Baovedet waere sjpäörend vanoet versjillende inválsheuk wiejere aanwiezinge aangedrage. Veer zeen van álles te weite gekómme det ’t verhaol ongersjteunt: ein väölzegkende analogie mit de hekseriej en onverwáchse parallele boete Remunj. Waas ’t eers nog maar de vraog waat de historiese substansie van Bacchus waar, alles bie-ein opgeteld is ’t noe toch waal heel erg onwaorsjienlik det hae in 1692 neet verzaope zól zeen!

De logika bepaolt aevel det ’t ritueel zellefs nog aajer mót zeen. Mér wiejväöl dan? De echte laeftied achterhaole is ein groot mér oplosbaar raodsel gebleke, ondanks ontbraekende direkte brónne. Alle dinkbare sjpaore – in de historiese vaklieteratuur, beeldende kúns, theologie, wetgaeving, lieteratuur, taal- en volkskunde – zeen veur dit ongerzeuk bewánjeld. Gezóch is nao meer of minder duudelikke verbénj tösse de feguur van Bacchus, de vastelaovend en de sjtad Remunj. Dees benadering via omwaeg nao de vermoede ‘kern’ beteikende knaokewerk mér waas ouch extreem lonend. Oeteindelik kinne veer noe mit vriej grote waorsjienlikheid de periode en de omsjtandighede identificere wo-onger ’t ritueel is ontsjtánge. En det is neet in de antieke tied of in de middeleewe gewaes

“De sjtad van Bacchus” besjteit oet twee bookdeile. In ‘t eerste deil, “Mythe en werkelikheid”, waere fabels en historiese feite róndj Bacchus geanalyseerd en ontward en wo neudig belunkes doorsgesjtaoke. In ‘t tweede deil, “Verbeelding en dichting”, waere de beeldende kúns en veural de 16e en 17e eewse nederlandjstalige lieteratuur ongerzóch.

“De sjtad van Bacchus” telt 274 pagina’s, wo-van mér leefs 32 mit foto’s en aafbeeldinge.

’t Book is riek verzeen van bróntekste en citate

Pries: € 18,95.

 

Hoerah! Dao zeen ze weer!” - De (10) Schmookers, ein Remunjse gesjiedenis 1898-1936 (versjene 2009)

Hoerah.jpg

 

Höb geer uch waal ins aafgevraog waat t’r veur D’n Uul waar? Beveurbeeld wiej de vastelaovend vreuger gevierd waerde in Remunj, veur 1936, dus veur d’n oorlog? Es geer ’t allemaol zo paraat höb, dan is det prima. Mèr es geer ’t neet weit en uch achter de ore krats, weit dan noe det d’r ein book is det uch de antjwaorde guf.

Bie oetgaeverie Jeube Press (Remunj) is ein sjtudie versjene euver de Schmookers, de legendariese Remunjse vereiniging diej aktief waar tösse 1898 en 1936. Vastelaovesvereiniging D’n Uul dank ziene naam en zien Zjwetskammezaol aan dit gezèlsjap, det zie es ziene veurluiper zuut. Sirkes Willems waerde in de jaore vieftig door aad-direktäör Driek Rademakers opgerìch nao ’t model van De Schmookers, es ein sjtamtaofel van pieproukers.

Aan de Schmookers danke veer det veer in Remunj uberhaup nog vastelaovend viere. Want wiej sjoon de vastelaovend veur WO I ouch bleujde, in de waereld van nao 1918 waar neet ederein van de vastelaovend gesjarmeerd. De moraalridders kwame en bleve aan de mách en de leefhöbbers van de authentieke Remunjse vastelaovend krege lange tied ein zjwaor piep te rouke. Aevel de Schmookers hele de sjtömming d’r in en hele paol.

‘“Hoerah! Dao zeen ze weer!” De (10) Schmookers: ein Remunjse gesjiedenis, 1898 – 1936’ vertelt uch ’t ganse verhaol van de opkóms, muziese prestasies, heugtepunte, politieke verwikkelinge en ongergangk van dit uuters geleefde Remunjs gezèlsjap.

Waat duudelik waerd, is det Remunj nog väöl meer aan dees getalenteerde en dapper mèn te danke haet. ‘t Is ein ongerhajend verhaol, det uch leut kinnismake mit ’t Remunjse vereinigings- en sosjeteitslaeve in de aaje tied, wiej d’r vol-op gezonge, gesjpeeld en gedáns waerde op soirées amusantes (noe: bontje aovende). Daomit herlaeve de tieje van de aaje Schinderhannes, de Kapitein van Köpenick, de opera Meneer Prikkebein van Felix Routs en neet te vergaete de drie fantastiese Remunjse Revues van de jaore twintjig, wiej in Remunj Charleston en Shimmy gedans waerde.

 Hoerah! Dao zeen ze weer!” telt 208 pagina’s, wo-van mér leefs 20 mit foto’s en aafbeeldinge. De hoofrolsjpelers kómme zellef oetveurig aan ’t waord in citateZo ontsjteit ein uniek tiedsbeeld.

Pries: € 13,95

 

Wo te koup? 

Hoerah! Dao zeen ze weer!”, “De sjtad van Bacchus” en “Waazes! Waazes!!” zeen in Remunj te koup bie bookhanjel / antiquariaat Boom en Plantage bookhanjel in de Neersjtraot, en daonaeve op ebay.nl. Op ebay.nl zeen verzendjkóste van toepassing à raison van € 6,95. Ouch kint geer kontak opnaeme mit Jean-Philippe Laugs (bel 06-51289152 of sjtuur eine mail nao info@jeube-press.net om uch te bevraoge).

 

LJP

Jeube Press, Dionysiussjtraot 220, 6041 GE Remunj - info@jeube-press.net